Thursday, March 24, 2016
යේසුස් ගේ ප්රේම වාදය...
අත්ල ඇණ මත ගැටී හිරවී
රත්ත ලේ බිඳු සොඳුරු නෙත් මත
කුරුස කණු මත සිරව සිතුවිලි
මුදුන් මත කඳු සිඛර සිරසේ...
තෙදැති මුහුණේ ප්රේමයේ රැළි
සිරව නිර් ධන සුසුම් හැඟුමන්
පතා නිර් ධන අරගලේ ජය
යදී ජනයන් පතා නිදහස...
සිතිජ හිරු රැස් මැලව මල රැස්
ප්රේමයේ ජය ඉවත ලා හිඳ
සුදු වළාකුළු අඳුරු ධජ සේ
ලෙල දෙමින් ජය නඟයි සාමයේ...
තුලාවට බර නොවී සමබර
වැඩවසම් රජ සිටුවරුන් හිඳ
පඬුරු බෙදමින් අහුරු පමණින්
රතු වයින් තොල් සතුටු වඟුරයි...
මැඳුම් මඟ වූ ප්රේමයේ මඟ
අසල හිඳ මග තොටින් නික්මව
යෝද මිනිසෙකු සිටී කුරුසියේ
ප්රේම වාදය ලොව සපථ කල...
සිතුවම Michael D. Hanson විසින්
Thursday, March 17, 2016
ලඟ එන අවුරුද්ද...
නීල තුරුපත් අතර
තනි වූ,
වතු සුදු මලකි හඬන
තනි වී පස් පිඩැල්ලක් මත
ලඟ එන අවුරුද්ද දැක දැක...
පස් මතින් නැගෙන ජීවය
වතු සුදු මලේ නුඹේ පෙති මත රැදෙන
කඳුළු බිඳුවකි,
කිරි කඳුළු බිඳුවේ
රැගෙන යන්න
සිනා මල් පොකුරු
මා බිළිඳු පුත් තොල් මතට...
එරබඳු මලේ
නුඹට මා හඬ ඇහෙනවද
ලඟ ලඟම එනවා අවුරුද්ද
සතුටු සිත් පුරවන්න,
අවුරුද්ද ලඟ හඬන
මා ප්රිය සමිඳු ලඟ...
කැවුම් කොකිසේ
මා හඬ නුඹට ඇහෙනවද
ලඟ ලඟම එනවා අවුරුද්ද
නුඹලව සොයාගෙන,
සලසන්න නුඹේ සෙනෙහස
මා ලබැඳි සිත් කැඳැල්ලට...
සුදු පාට හුණු තැවරුනු
බිත්ති කුළු මත
දැනෙයි අවුරුදු සුවඳ
පෙර සේම මා හට,
කොහෝ ගී ගයයි පෙර සේම
කණ වැකෙයි ශෝක ගී හඬ...
සුදු පරවියනි නැවත එන්න
ලඟ ලඟම එනවා අවුරුද්ද
රැගෙන ගොස් මා සතපන්න
බලාපොරොත්තුවේ සයන මත,
නැවත රැගෙන එනු පිණිස
අවුරුදු සතුට...
Wednesday, March 9, 2016
මහළු ප්රේමය...
මා රැගෙන යන්නට ඇවැසිය
මා පසු පස හඹා දිව එන
පිණි දිය පොකුරු වන්
ඒ නිත්යක් නොවූ සුළඟට...
මා ලයෙහි තුරුළුව
ගත වෙළී සිත පෙළන
සෙවනැලි අතර සැඟවෙන
පොකුරු පෙණ මත විසිරෙන
ඒ වෙහෙස,
ඔබේ දෑත් මත සඟවන්න කාලයකි මෙය...
තුරඟෙකු මතින් නැගි
නිල් අහස මත දිවන
ගව් දහස් දුර සැරිසරන
චිත්ත මනෝකාය
සුසුම් පිරි, පැතුම් මත
හිනහෙන්නට වෙර දරන අරුමය...
මා විඩා නිවන්නට
ඇවැසි ජීවය
මිරිඟු වැලි කතරක
සිසිල් දිය පහසක සඟවන
පෙම්බරිය,
ඉඩ දෙන්න සත්ය සොයා පියඹන්නට...
ගිලුණු නැව
මල බැඳෙන්නට හැර
බලා හිඳ සුසුම් නොහෙලන්න
ඔබේ වර, නොලත් වරම ලැබ
ඉඩ දෙන්න සුළඟට
නැවත හදවත වෙලන්නට....
Monday, March 7, 2016
නිහඬ කල්පිතයන්...
කැමරා කාචයකි ඇස අසල
සොඳුරු , දුක්ඛිත , බියසුළු දසුන් මවනා
සැඟව මා එහි කොණක
නගනු පිණිස සේයා රුවට
ඒ නිහඬ කල්පිතයන්...
HIV බෙදුම්වාදය
------------------
හදවතේ ගැඹුරටම වැද රිදුම් දෙන
ලපටි කඳුළු බිඳු අඟ
මව් සෙනෙහස උතුරා යන අයුරු
දුටුවෙමි
සමාජ අත්මාර්ථයන්ට නොදෙවෙනිව...
අහම්බෙන් දුටිමි
කැමරා කව තුළින්
HIV නම් නොසෑදෙන බව
කිතුනුවන්ට , ඉස්ලාමීන් හට
සාක්ෂි නැති මරණයක් සේ
නැගී ආ ඒ භේදය
දසුන් විය ඒ අසාධාරණය...
ප්රේමයේ සුවය
---------------
නොලත් ප්රේමයේ සුවය
දුටිමි චතුරස්රයේ හිඳ
ලබන අපූරුව
කාමරයකට කොටු නොවී විවෘතව,
කතා වැලක් මත තනි වූ ඒ සිනා රැල් අඟ
නිදහසේ සිතුවිලි නිදහසේ පාවෙමින්...
පාවෙනා ඒ සිතුවිලි
ඉබාගාතේ ඉඟිලෙන
රෞද්ර විහඟුන් ඩැහැගෙනා යන අයුරු
දසුන් විය කැමරා කව තුළින්...
-------------------------
සියළු හැඩතල දුටිමි
කව තුළින් විනිවිදව
නොහඳුනන අරුත් ඇති
ඒ දසුන්,
ධනවාදී ද
සමාජවාදී ද
කිව නොහැක
මන්ද තුළාවට බර සමානය....
Thursday, March 3, 2016
නැවත එන්න දෙවෙන්දොරා...
අහස පුරා කළු අඳුරිත
මූසල හිම වැටෙන රැයේ
සකුරා මල් මත හිම කැට
පොකුරු පොකුරු සුදු තරු කැට...
මතක සිතේ ඔබේ හැඟුම්
ඇසි පිය යට තුරුළු වෙලා
සීතල හද උණුසුම් කර
නැවත එන්න දෙවෙන්දොරා...
මිදෝරියා අවන්හලේ
කෝපි සුවඳ එහි තනි වී
නිල් ගුවනේ දුම් වළාව
දසත පුරා සුදු දුම් රැල්...
සීතල ගත වී උණුසුම්
සිතට නැඟී කබුකි රැඟුම්
තනි වී ඔබේ මතක රැඟුම්
නැවත එන්න දෙවෙන්දොරා...
පාළු මගෙහි ඔබේ සිතුවම්
මැවී පෙනෙයි මායා සේ
හිම කැට පිරි කුණාටු වැසි
සිතුවම් බොඳ කර සායම්...
සයොනාරා නොකී ගමන
ඔබත් ගිහින් මා තනි කර
කබුකි රඟහලේ දුන් ගිවිසුම
සමඟ එන්න දෙවෙන්දොරා...
මළගිය ඇත්තන් කැටුවම
නැවත එන්න දෙවෙන්දොරා....
Tuesday, March 1, 2016
වෙරෝනිකා...
තත් ගැටෙන හඬ මට තාමත් ඇහෙනවා
නුඹේ ඇඟිළි මත ගැටුනු
ඒ සිත් රැඳි සුළඟ
මගේ සිත් අඟ හිනහෙනකොට
නුඹේ සිත් ලඟ හැඬුවා
ඒත් ඒ කඳුළු බිඳු වැටෙන හඬ
මට ඇහුනේ නෑ වෙරෝනිකා...
තත් එකින් එක කැඩෙනකොට
නුඹේ දැහැන බිඳෙනකොට
මා සමධි ගත වුනා,
ඒ නුඹේ හිතේ තිබුණ පින්වත් බව නිසා
ලෝකයා ඔබෙන් නොදුටු ඒ පිවිතුරු බව
නුඹේ හදවතින් මා දුටුවා වෙරෝනිකා...
නුඹට ගමට යන්න බැරි වෙන්න ඇති
ළිඳ ගාව ගෑණු
නුඹ දැක රහස් කොඳුරන්න ඇති
නුඹේ හිත රිදුනත්
නුඹ නෑහුනා සේ යන්න ඇති
ඒ නුඹේ හදවත උන් දැක්කේ නැති නිසා වෙරෝනිකා...
ලෝකයා නුඹට නෑ නෑ කිව්වට
නුඹට පින්වත් ආත්මයක් තිබුණා
නුඹ කලේ නුඹේ රක්ෂාව
හරියට රජයේ ලිපිකරුවෙක් වගේ
හරියට දොස්තර කෙනෙක් වගේ
හරියට ඉංජිනේරුවෙක් වගේ
ඒ බව ලෝකයා දුටුවේ නෑ වෙරෝනිකා...
ලස්සන ආදර කතා තිබුණට
රෝස්, ජැක්ට සැලකුවේ නුඹ වගේ නෙමෙයි
ජුලියට්, රෝමියෝට සැලකුවේ නුඹ වගේ නෙමෙයි
උන්ගේ ආදර කතා ලෝකයා රස විඳිනකොට
නුඹේ ආදරේ උන් කෙලසුවා
ඒ නුඹට සාපේක්ෂ රාමුවට
උන් නාපු නිසා වෙරෝනිකා...
මං ඇත්තටම නොදැන සිටියා
නුඹේ ආදරේ සැබවින්ම පිවිතුරු බව
නුබේ මිනිහට බෙහෙත් හොයන්න
නුඹේ පතිවත විකුණපු බව
ඉතින් වෙරෝනිකා සමාවෙයන් මට
නුඹ නොහැඳින ගත්තාට....
Subscribe to:
Posts (Atom)