Saturday, June 18, 2016

නිත්‍ය මඟ...
















රළු ගල් ඉවුරු තල මත
සුමට ඉරි ඇඳ හැඩ කර
ප්‍රාණ දී බලා හිඳ සමාධිව
සිත් නිවයි සරන සෙව් දනන් හද...

සොයා ආමිස සිත් සුවය
පලා ඇවිදින් සොයා පින් මඟ
පුබුදුවා දෙඅත් මත කමල අංකුර
හැඩ කරයි නළල් සිඹ පිපුනු මල කමල...

පංච හිල් නොවසා බලා හිඳ
සත්‍යය සොයා යයි මුහුදු රළ මත නැග
සැඬ රළ වැදී අබලන්ව ඔරු කඳ
මුහුදු කුස සැතපෙයි ගිලන් වූ ඔරු කඳ...

රටා වියනා පාට ගෙත්තම් පැඳුර
හැඩ මවයි වැලි අමදිනා සුදු මළුව
වැලි කැට ගණින සංසාර මඟ ගමන
බලා දැක දුක් වෙයි ඥාණ දන නිවුනු සඳ...

පාට දුර්පැහැ පොවන සුවඳ මල
අත්ල මත පරව මැලවෙයි නෙතඟ අභියස
පසක් වෙයි මුණිඳු සඳ පෙන්වු මඟ
එබැවින් උතුම් වෙයි ප්‍රතිපත්ති පිළි මඟ...

Sunday, June 12, 2016

නොඇසෙනා ආදරය...














සඟවා සිටින නුඹේ හඬේ උණුසුමට
මා සිත හඹා යයි දේදුණු සිහින අතරින
නුඹ තොල් මතුරනා නොඇසෙනා ගී රාව
මනරම් අරුත් පසඳි රැළි නැගෙන වැව් දිය මත...

දිරා ගිය ගස් අඟ මුල් මත හිඳ
නුඹ නුරා නෙත් මවනා වදන් පෙළ
මා නෙත් මතට පිණි පොකුරු බිඳු ඉස
ආල සිත් දැල්වෙයි හිරු බසින සැඳෑවට...

නුඹ ඇඟිළි තුඩු අඟෙහි රැඳි වචන පෙළ
පණ ගසා හුස්ම ගෙන වා තලය සිප
මා කණ් පියන් මත වැකුණු ඒ හඬ
මා හද වෙලයි ඒ සොඳුරු සිත්තම...

සුදු පෙණ රැළිති පුපුරණා ගී හඬ
තත් හඬ නඟයි දිලෙන නුඹ නෙත් යුග
වැලි කැට සිඹින මා කඳුළු කැට
කවි පද මවයි වසා තඹ වැලි ඉවුර...

රොද බඳින වැහි බිඳු වැටෙන තාලයට
හද ගැහෙන හඬ ඇසෙයි මල් වැටුණු කුඩය යට
තෙතබරිත තණ මල් පිණි වැටී දිලිසෙන කොට
ඉහිලුම් නොදෙයි හද වැකෙන කවියට..

Pix by QiQigallery